Fréttir / tilkynningar

Egill með ókeypis tónleika 17. desember

Egill Sæbjörnsson verður með tónleika ásamt mörgum, kunnum tónlistarmönnum í Listasafni Reykjavíkur - Hafnarhúsi næstkomandi fimmtudagskvöld kl. 20:30. Aðgangur er ókeypis en tónleikarnir eru haldnir í tilefni af sýningu hans Staðarandi og frásögn sem nú stendur yfir í Hafnarhúsinu og nýlegum geisladiski. Tónleikarnir eru  í samstarfi við hljómplötuútgáfuna Borgin. Á tónleikunum leikur Egill ýmis lög frá ferli sínum.

Egill hefur verið virkur í hringiðu myndlistarinnar á meginlandi Evrópu undanfarin tólf ár, en sýning hans í Hafnarhúsinu er fyrsta stóra einkasýning hans í safni hér á landi. Vegleg bók um listamanninn kom út fyrir skömmu og er hún fáanleg í Listasafni Reykjavíkur og bókaverslunum.
Sýning Egils stendur til 3. janúar 2010.

Egill er einn þeirra listamanna sem valinn var á Carnegie Art Award 2010 en hann hefur verið afkastamikill í sýningahaldi og gjörningagerð á undanförnum árum. Framundan hjá Agli eru sýningar í virtum listastofnunum á borð við Frankfurther Kunstverein, Göttingen Kunstverein og víðar.

Munið líka eftir heimildarmyndinni um Egil sem verður endursýnd í Sjónvarpinu laugardaginn 19. desember kl. 13:40. Heimildarmyndin er gerð af frönsku sjónvarpsstöðinni Arte og var frumsýnd samtímis í Frakklandi og Þýskalandi fyrr á þessu ári.