Fréttir / tilkynningar
Erró – Mannlýsingar / Konur frá Norður Afríku
An upcoming exhibition Í tengslum við sýninguna Erró – Mannlýsingar í Hafnarhúsinu var hleypt af stokkunum sýningaröð innan sýningarinnar þar sem sjónum er beint að ákveðnum þemum í verkum Errós. Síðast voru það geimfarar en á sýningu sem opnuð var í síðastliðinni viku er áherslan lögð á verk af konum frá Norður-Afríku.
Erró hefur verið mikið í sviðsljósinu undanfarið vegna nýrrar sýningar á teikningum í Pompidou safninu í París, sem er eitt af stærstu söfnum heims. Samkvæmt nýlegum upplýsingum koma daglega um 4.000 gestir á sýningu Errós og frá opnun hennar hafa yfir 120.000 manns séð hana. Auk þess hafa bækur og póstkort, sem gefin voru út í tilefni sýningarinnar, runnið út. Um sýninguna Konur frá Norður Afríku
Erró skapaði margar myndaraðir, klippimyndir og málverk í byrjun 9. áratugarins þar sem hann setur á svið glæsilegar ungar stúlkur frá Norður Afríku naktar eða sveipaðar klæðum. Uppruna þessara mynda er að finna í miklu safni póstkorta sem Erró og vinur hans Jean-Jacques Lebel fundu á flóamarkaði í París. Póstkortin voru gefin út í lok 19. aldar og fram til 1940 og bárust um Frakkland á tímum nýlendustefnu Frakka í Norður Afríku. Póstkortin miðluðu óraunverulegri sýn á konur frá nýlendunum til fjölskyldna, kunningja og ástvina á meginlandinu frá ferðamönnum, hermönnum, embættismönnum eða landkönnuðum.
Fyrirmyndirnar, oftast vændiskonur, voru ljósmyndaðar á klisjukenndan hátt þar sem blandað var saman erótík og framandleika sem lýsti fyrst og fremst kynlífsdraumórum vesturlandabúa. Þó svo að konurnar í hinum arabíska heimi séu fjarlægar og sveipaðar blæjum sýna ljósmyndirnar þær út frá sjónarhóli skáldsögunnar Þúsund og einnar nætur og eru ennfremur framhald af Austurlandamálverkinu (Orientalism). Af vanvirðingu fyrir menningu þeirra og hefðum afklæða ljósmyndaranir, meira eða minna, hinar fögru meyjar. Oft fylgja ljósmyndunum skýringatextar sem afmarka fyrirmyndirnar við ákveðna þjóðflokka (Mára, Arabíubúa, konur frá Ouled-Nail...) og sem ætlað er að renna stoðum undir þá hugmynd að þessar „innfæddu“ konur séu auðveldlega aðgengilegar og jafnvel til ráðstöfunar. Í staðin fyrir þessa ímynduðu og háskalegu framsetningu, setur Erró á svið aðra frásögn sem ætlað er að heiðra þessar þögulu og óþekktu hetjur. Með því að leiða saman þessar andlits- og nektarmyndir ásamt myndum frá hinum vestræna menningarheimi, nær Erró að endurvekja hugmyndir um mögulegan sannleika þessara kvenna m.a. með fjölbreytilegum samsetningum og hugmyndatengslum. Í málverkunum undirstrikar Erró annars vegar fegurð þeirra með nærveru undurfagurra blóma, og hins vegar gefur hann m. a. til kynna stöðu þeirra sem „neysluvarnings“ með því að stilla þeim upp andspænis kyrralífsmyndum eða þá að umbreyta þeim í fórnarlömb drottnandi karla- og nýlenduveldis með tilheyrandi stríðsmyndum. Sýningarstjóri er Danielle Kvaran.
Prentað af vef Listasafns Reykjavíkur, www.listasafnreykjavikur.is þann 17.59.2012 |