Útilistaverk

Í tilefni af þjóðhátíð Íslendinga árið 1874 færði danska þjóðin Íslendingum að gjöf sjálfsmynd Bertels Thorvaldsen, sem var íslenskur í föðurætt. Myndin var sett upp á Austurvelli 1875, en hún var fyrsta útilistaverkið sem reist var í Reykjavík.

Þar var ekki fyrr en 1907 sem næsta höggmynd var afhjúpuð í borginni (minnismerki Jónasar Hallgrímssonar skálds eftir Einar Jónsson myndhöggvara). Alla tíð síðan hefur verið lagður metnaður í að fegra borgina með útilistaverkum, sem framan af voru jafnframt minnismerki um einstaklinga tengda sögu og menningu landsins. Fyrsta útilistaverkið sem vísar hvorki til einstaklings né í söguna var sett upp 1928, en það var verkið Móðurást eftir Nínu Sæmundsson.

Listasafn Reykjavíkur hefur nú umsjón með rúmlega eitt hundrað útilistaverkum í borginni. Þessum verkum hefur fjölgað jafnt og þétt, og dreifast þau um alla borgina, þó flest séu í miðborginni og í eldri borgarhlutum. Útilistaverkin í borginni gefa listsögulegt yfirlit íslenskrar höggmyndalistar á 20. öld.
Síðustu ár hefur verið unnið markvisst að því að fjölga listaverkum í nýjum hverfum og verður því haldið áfram í framtíðinni.

Útilistaverk í Reykjavík - PDF - 29MB

Listaverk í höggmyndagarðinum við Ásmundarsafn . pdf skjal

Útilistaverk í Reykjavík- Sigurlaug Ragnarsdóttir, 2010